خواطر عن قصةَ كل كفيفٍ رُد إليه بصره

   خواطر عن قصةَ كل كفيفٍ رُد إليه بصره

خواطر تترك أثر في النفس. وأنا بقلب في التايم لاين شوفت بوست بعنوان “سبتوا بعض ليه” ، دخلت أعلق وأكتب “ماكنتش تستاهل ولا حب ولا معافره ولا حتي محاوله جديده ، كانت غبيه وضيعتني من أيدها”

قبل ما أكتب الكومنت أخويا الصغير وقع فجريت عليه ، رجعت مسكت الفون تاني ، جيت أكتب دوست بالغلط علي التعليقات الجديده

لمحت أسمها ، ضربات قلبي زادت وجسمي أرتجف ، طلعنا في نفس الجروب ، بصيت لأسمها لثواني قبل ما أقرأ

“الساعه أربعه العصر كانت أخر ماسج منه ، قالي فيها مبقتش قادر أستحملك ، أهاني وشتم بس أنا عذراه عشان كان مقهور وكان نفسه أتمسك بيه

 أنا كنت هبله وشايفه نفسي عليه عشان كان مضمون ، كنت بحايله بكلمه ، براضيه بمكالمه ، جه علي نفسه كتير “

سابت مسافه وحطت قلب مكسور

“كنت متأكده أنه مهما هيبعد هيرجعلي ، مكنتش متوقعه أن دي المره الأخيره وأنه مع كل عتاب حبه بيقل ، عارفين ،

أنا من كتر ما كنت بطلعه غلطان مكنش بيقولي إنه زعل ، أنا كنت وحشه لأبعد حد”

قريت الكومنت ست مرات ، في كل مره وجع قلبي بيخف وبيهدا.

بعد ذلك أستحقرت نفسي إني كنت متاح ، شوفت في كلامها قد إيه انا كنت غبي

مكملتش الكومنت بتاعي ، مالوش داعي حد يشوفه وأبان راجل بيجري ورا ست

في الليل

في نفس الجروب بالليل نزل بوست تاني بعنوان “فاكرين عن بعض إيه” ، معرفش ليه أبتسمت وجريت أكتب عنها ، منعت نفسي بس البوست ظهر قدامي تاني لقيتني بكتب

“بترسم قلب صغير علي الفلوس بالقلم الجاف ، قبل ما بتسمع أي فيلم بتبقي مجهزه طبق فاكهه ، مقتنعه أن جسمها كيرفي وهيا فلات ،

بتقص ضوافرها بأسنانها كل خمس دقايق ، بتقول بعد كل جمله “فاهمني” ، شايله خمسه جنيه قديمه وبتقول عليها “مصدر حظي”

“هيا مش مميزه ، هيا كانت مختلفه ، بطريقه أذتني”

عندها أفتكرت كام حاجه ليها في دماغي وضحكت ، لقيت notification بأن حد رد علي الكومنت بتاعي ، فتحتها لقيتها هيا

نفس الرجفه وضربات القلب الزايده

كتبت “مقتنع أنه هيبقي أصلع بعد الجواز ، شايل ولاعه في جيبه دايما مع إنه مابيدخنش ، بيحط زيت عشان دقنه تكمل ، بيحب اللون السماوي ونفسه يشتري كلب ،

بيتكسف يقول قدام حد إنه بيتخيل أمه ماتت وبيفضل يعيط عليها ، قتل اربع كتاكيت وهو صغير

“هكون ممتنه ليه طول العمر ، لو سامحني”

ماعرفش رديت عليها ازاي وقولتلها “انتي بخير” للحظه حسيت إني ماعنديش كرامه بس ماعرفتش أمسح الكومنت ،

في نفس اللحظه لقيتها بعتتلي ماسج ع ماسنجر

أعتذرت فيه ، قالت كلام كتير ، عيطت ، أتأسفت ، قالت خسرتك ، وفي الأخر قالتلي نرجع !

ضحكت لما قريت كلامها ، فكره أني أشوفها بتكتب ، أشوف ماسج منها تاني ،

تحط اسمي في نص الكلام ، أسمع صوتها ، كنت مفتقد كل دا أوي

وكالأهبل قولتلها “موافق نرجع” ، إحنا لما نحب بنبقي مهزأين اوي ، أتقدملتلها وخطبتها ، أتغيرت ،

حسيت إنها تاهت من بعدي وضعفت ، فرحتها كانت غالبه فرحتي

عينها منزلتش عني يوم خطوبتنا ، كل شويه تعدل الكرفته ، أبتسامه هاديه مع كل نظره منها كأنها بتقولي

متأكد انك سامحتني ، طب أنا أستاهل تسامحني و حقيقي ساعات البعد بيكون أنسب طريق للحب. ♥️♥️

وما أجملها من خواطر

منقول من صفحة سكن…. 💙💙 https://m.facebook.com/Saqan77/?tsid=0.08451659530365951&source=result

إهداء من الصديقة نهار nahar

حول chef Gorge

Gorge chef
يارب مشيئتك

تصفح أيضاً

أسئلة حيرت الأطباء وعلماء الأحياء

أسئلة حيرت الأطباء وعلماء الأحياء

أسئلة حيرت الأطباء وعلماء الأحياء أسئلة حيرت الأطباء وعلماء الأحياء في اِجابتهم على بعض أصعب …

%d مدونون معجبون بهذه: