أخذ عينة من بقايا الإنسان أصل الشعوب
أخذ عينة من بقايا الإنسان

أصل الشعوب

أصل الشعوب في بلاد الشام

 أصل الشعوب هو موضوع بيشغل الباحثيين على مر العصور. من أهم الأمم و الشعوب اللي مرت على المنطقة هنن الكنعانيين أو الفينيقيين , أحد الشعوب
السامية الأصلية لمنطقة بلاد الشام (سوريا – لبنان – فلسطين – الأردن) أعطوا العالم أول أبجدية
بالإضافة للأبجدية الفينيقية اللي عملت نهضة كبيرة بتطور اللغات و كتابتا و تدوينا
بالإضافة لهالشي عطوا أول نوتة موسيقية بأوغاريت و من أجمل الأساطير و الحكايا الدينية اللي
أثرت بأديان المنطقة على مر العصور….
فهل هاد الشعب العظيم انقرض ؟ وشو هو أصل الشعوب في بلاد الشام ؟
لو إنت/ي سوري, لبناني , أردني , فلسطيني و حابب تشوف الكنعانيين ففي طريقتين : إما إنك تشوف
حدا من أهلك أو تطلع على حالك بالمراية لأنو الكنعانيين عايشين فينا عن طريق جيناتنا , أو
بشكل أصح نحن كنعانيين
بس لحظة علي! الشعب الكنعاني انقرض تماماً و ما عد إلو وجود يعني هنن أمة بائدة و بعد فترة
معينة من دخول اليونانيين و من بعدن الرومان للمنطقة ما عد سمعنا عن حدا كنعاني أو فينيقي!
هي الفكرة مو صحيحة أبداً و رغم إنو المنشور عن الجينات اللي العلم المرتبط فيها هو أحد أجدد
و أهم العلوم الحديثة بس رح إعطي نبذة تاريخية بسيطة

نبذة تاريخية

ببلاد الشام كان في أموريين و هنن يعتبروا أحد أوائل أو بالأحرى أول موجة من الساميين و عملياً
أول حضارة ببلاد الشام و انتشروا فعلياً بكل بلاد الشام… لأ و وصلوا لشبه الجزيرة العربية هنن
و السومريين (حضارة الدلمون بالبحرين) لكن طبعاً تمركزن الأساسي هو بلاد الشام و بلاد الرافدين
حيث حكم الأموريين عدة ممالك كانت سومرية و أنشؤوا كمان عدة ممالك لإلهن بالمنطقة من أشهرا
ماري و إيبلا و باشان و غيرن… حتى كانوا أول من بنى مدينة تدمر
البعض بيعتبر الكنعانيين هنن الأموريين اللي سكنوا الساحل بس ما حدا بيعرف , و البعض بقول إنو
الآراميين هنن أموريين كمان و بقولوا إنو قبائل الأحلامو اللي هي أوائل القبائل الآرامية انعثر
على هاد الاسم “أحلامو” كاسم شخصي لأموريين فاستنتج البعض إنو الأموريين هنن أجداد الآراميين
و رغم إنو ما في حدا بيقدر يأكد هاد الشي بس بالفعل الشعوب التلاتة سكنوا بنفس المنطقة من
أقصى شمال سوريا لأقصى جنوب الأردن و من شرق بلاد الشام لغربا و كان بكل حقبة تزدهر حضارة منن
فيشيع اسما محل الباقيين , بمعنى إنو عملياً هي الشعوب ما انقرضت إنما كان يتبدل اسما و يحل
اسم محل اسم , و احزروا شو كان آخر اسم ؟ آخر اسم كان هو “السوريون أو السريان” و هاد الشي
أكدوا أبولوس ملك أفاميا لما قال “أولئم الذين نسميهم Syrians (اللفظ الحرفي سريان و كمان
بصح نقول بالعربي سوريين) هم يسمون أنفسهم آراميين” و بتأكد كتير مراجع إنو اسم “سوريين”
أطلق على كل من الآشوريين (و اللي الاسم اجى أساساً منو) و الآراميين و الكنعانيين (الفينيقيين)
و الأنباط
فإذاً هي الشعوب ما بصح نقول عنها بائدة , إنما تغير الاسم فقط , و نحن لهلا عنا بتراثنا شغلات
مستمدة من هالحضارات القديمة منحكي عنها لاحقاً

علم الجينات ,وتفسير أصل الكنعانيين

نشرت مجلة Cell بحث جيني على عدة جثث مستخرجة من مواقع كنعانية مختلفة و متباعدة جغرافياً
بجنوب بلاد الشام و بشكل أساسي من فلسطين و الأردن و لبنان متل حضارة عين غزال بالأردن و صيدون
بلبنان و أثبتت الدراسة إنو هي الجثث مرتبطة جينياً ببعض لدرجة كبيرة بالتالي خلصت الدراسة (
بعد حكي كتير و رح إترك الرابط آخر شي) إنو هي المنطقة كانت بالفعل بتنتمي لحضارات ة ثقافات
متشابهة و سكنها شعب متجانس هو الشعب الكنعاني , مثلاً كانت عينات صيدون من لبنان مشابهة و شبه
مطابقة لعينات عين غزال بالأردن رغم إنو فترة حياة جثث منطقة عين غزال أقدم بحوالي 800 سنة من
العينات الصيدونية و بتأكد إنو شعوب العصر البرونزي متل العمونيين و الموآبيين و غيرهم ببلاد
الشام كلهم رغم اختلافات ثقافية و لغوية صغيرة بس كان عندهم نفس البروفايل الجيني
إذاً هي الدراسة و غيرا من الدراسات متل دراسة Marc Haber حطو حجر الأساس يعني صرنا منعرف
بفضلن إنو بالفعل في شعب كنعاني مترابط جينياً و كمان صرنا منقدر نقارن الجينات لشعوب بلاد
الشام اليوم مع نتائج هي الدراسات و نقدر نجاوب على سؤال هل هي الجينات مرتبطة ؟ و هل شعوب
بلاد الشام اليوم مرتبطين بهي الحضارة ؟هاد الشي مهم و بجاوب على خرافة للأسف منلاقيها منتشرة
كتير هي إنو نحن السوريين و بقية شعوب بلاد الشام مخلطين كتير شي عرب شي محليين شي رومان شي
يونانيين شي فرس شي مدري شو و كأنو حدا حط هالشعوب بخلاط و ضربا ضربتين و طلعنا نحن شعب ما
بمت لهالأرض بصلة… بينما هو صحيح عدم وجود عرق صافي و إنو نحن بالفعل عنا نسب “و ركزوا إنها
نسب” من مناطق تانية خاصة من شعوب المتوسط لكن هي نسب قليلة مو كبيرة و بتبقى أصولنا الأساسية
محلية وهلأ صرنا نعرف أصل الشعوب

الدراسات الجينية عن المقارنة بين شعوبنا الحالية و شعوب المنطقة الكنعانية

بدراسة نشرتها American Journal of Human Genetics و دعمتها و أكدتها The Wellcome Trust
أكدت من خلال دراسة عينات من 5 جثث من صيدون و مقارنتا مع 99 شخص لبناني إنو عالأقل 90% -إلى
93%- من جينات اللبنانيين هي كنعانية أو فينيقية و مطابقة و مشابهة لعينات هالجثث! تخيلو إنو
الجثث هديك بترجع لحوالي 3700 سنة يعني الشعب اللبناني اليوم هو بالفعل فينيقي
بإجراء المقارنة بين عينات صيدون مع عينات من الشعوب السورية و الفلسطينية و الأردنية الحديثة
كان في تقارب كبير بينن كمان لكن أقل بشوية صغيرة من تقارب اللبنانيين معن (بعتقد طبيعي كونو
العينات من صيدون و صيدون بلبنان – و شي خارجي بحب إذكرو من الدراسات اللي نشرتا سابقاً فلا بد
يكون في شوية اختلاف لكن لا يذكر مثلاً الأردنيين كانوا الأقرب للآشوريين بين شعوب بلاد الشام) كمان
الدراسات بتقول إنو بالنسبة للبنانيين فما كان في فرق بين البروفايل الجيني الديني يعني
المسلم و المسيحي و الدرزي هنن أحفاد الفينيقيين (ملاحظة للأمانة كان في دراسة حول دروز سوريا
بتقول إنهم أقرب للأرمن و بيستمدوا حوالي 80% من جيناتهم من المنطقة الواصلة بين أرمينيا و
سوريا عبر تركيا لكن كانت الدراسة مقسمة الدروز ل 3 فئات فما بقدر إعطي معلومات من عندي ,
حسب شجرة الجينات لغرب آسيا كان اللبنانيين و الدروز كتير قريبين من بعض هاد ممكن يعني إنو
الدروز اللبنانيين أقرب لبقية الفئات اللبنانية من قرب الدروز السوريين لبقية الفئات السورية
بحكم إنو الدروز عندن بروفايل جيني خاص فيهم لأن الزواج محصور ضمن أبناء الدين الواحد فما
اختلطوا مع بقية فئات المجتمع , نفس حالة المسيحيين و الأيزديين بالمنشور السابق حول العراق)

دراسة تانية

و حسب دراسة تانية فإن الفلسطينيين و الأردنيين و اللبنانيين بيستمدوا عالأقل نصف جيناتهم يعني
50% عالأقل من سكان بلاد الشام من الكنعانيين بالعصر البرونزي حوالي 3000 سنة من هلا (هي
الدراسة ما فيها معلومات عن سوريا)
و بالأخير الدراسة المحببة إلي كتير Hajjej et al 2017 اللي بتقول إنو سكان بلاد الشام
السوريين و الفلسطينيين و اللبنانيين و الأردنيين مرتبطين جينياً ببعض جداً و السبب بعود للأصل
الكنعاني المشترك لهالشعوب لدرجة ممكن القول فيها إنو الكنعانيين هنن أجدادن
معناها بكل ثقة منقدر نقول إنو نحن سكان هالمنطقة الأصليين من آلاف السنين رغم كلشي مر
عالمنطقة من شعوب تنافست عالحكم.. كانت تتغير السلطة و بيبقى الشعب واحد
أخذ عينة من بقايا الإنسان أصل الشعوب
أخذ عينة من بقايا الإنسان

المصادر و المراجع في أصل الشعوب

1- دراسة Cell على الجثث الكنعانية :
2- الدراسة حول اللبنانيين :
و الدراسة المفصلة نشرت بعنوان “Continuity and Admixture in the Last Five Millennia
of Levantine History from Ancient Canaanite
and Present-Day Lebanese Genome Sequences” و موجودة PDF على ResearchGate بتقدرو تحملوها
من الرابط :
3- الدراسة حول اللبنانيين و الفلسطينيين و الأردنيين و السوريين نشرتها مجلة LA Times :
4- الدراسة حول اللبنانيين و الفلسطينيين و الأردنيين (ما في معلومات عن سوريا – و كمان
القائم على الدراسة هو أحد أعضاءالفريق اللي نشر دراسة Cell) الدراسة نشرتا جامعة تل أبيب و أنا صراحة غيرت اسم “عرب اسرائل” لـ “الفلسطينيين” لأن هاد الاسم الصحيح :
5- دراسة Hajjej et al حول مقارنة أصول شعوب المنطقة ببعضا و منها حول الأصل الكنعاني لدول بلاد الشام :

حول chef Gorge

Gorge chef
يارب مشيئتك

تصفح أيضاً

أسئلة حيرت الأطباء وعلماء الأحياء

أسئلة حيرت الأطباء وعلماء الأحياء

أسئلة حيرت الأطباء وعلماء الأحياء أسئلة حيرت الأطباء وعلماء الأحياء في اِجابتهم على بعض أصعب …

%d مدونون معجبون بهذه: